|
1 лютага |
 |
Пазаўчора ў нашым календары мы распавядалі пра Андрусаўскае замірэньне паміж Рэччу Паспалітай і Маскоўскай дзяржавай, у выніку якога крывіцкі горад Смаленск назаўсёды адыйшоў да Расеі і такім чынам была спыненая 13-гадовая вайна. А сёньня -- дата завяршэньня папярэдняе вайны паміж нашымі продкамі і продкамі сучасных расейцаў. 1 лютага 1618 году было падпісанае Дзявулінскае замірэньне. Ягоная назва паходзіць ад вёскі Дзявуліна пад Масквой. Паводле гэтага замірэньня расейскі ўрад адмаўляўся ад прэтэнзіяў на Смаленск, чарнігаўскія і ноўгарад-северскія землі. Аднак шмат супярэчнасьцяў засталіся нявырашанымі, што прывяло да наступных жорсткіх войнаў 17 стагодзьдзя. Тым ня менш, Дзявулінскае замірэньне паказвае на тое, што ў тыя часы Рэч Паспалітая была дужэйшая за маладую Маскоўскую дзяржаву. На працягу стагодзьдзя суадносіны будуць мяняцца на адваротныя. Масква будзе ўсё больш моцная і агрэсіўная, а Рэч Паспалітая пачне занепадаць. “Дзявулінскае замірэньне 1618 году паклала канец доўгай спусташальнай вайне, пляцдармам якой была Беларусь, і на дзесяцігодзьдзі злучыла ў адно цэлае этнічныя беларускія землі“. -- піша гісторык Генадзь Сагановіч.
1 лютага 1863 году -- дзень пачатку антырасейскага паўстаньня, якое шырака вядомае ў Беларусі як паўстаньне Каліноўскага. Літоўзскі правінцыйны камітэт абвясьціў сябе Часовым урадам на акупаваных Масковою землях Беларусі і Літвы. Быў прыняты маніфэст аб пачатку паўстаньня і надзяленьні сялянаў зямлёю.
1 лютага 1913 году нарадзіўся Сяргей Прытыцкі. Ягонае імя варта згадаць хоць бы ўжо таму, што яго ім названыя вуліцы ці ня ў кожным заходнебеларускім горадзе і мястэчку. Савецкая прапаганда рабіла з Прытыцкага вобраз гэткага рамантычнага героя-падпольшчыка ў міжваеннай Заходняй Беларусі. Гэта ён проста ў залі Віленскага суда расстраляў сьведку на працэсе Грамады. Пасьля быў прысуджаны да сьмяротнага пакараньня, але, як кажуць, пад націскам сусьветнай грамадзкасьці прысуд быў заменены на турэмнае зьняволеньне. Пасьля вайны Прытыцкі займаў у БССР высокія партыйныя пасады. Пра ягоныя геройствы нават зьнялі фільм “Чырвонае лісьце“.
1 лютага ў 1931 году ў Сьвярдлоўску нарадзіўся першы расейскі прэзыдэнт Барыс Ельцын. Сёньня ён адзначае свае 70-я ўгодкі ў маскоўскай цэнтральнай клінічнай лякарні, куды патрапіў пару дзён таму з-за пагаршэньня здароўя.
1 лютага 1969 году ў ангельскіх гіт-парадах на першае месца выходзіць кампазыцыя гурта “Fleetwood Mac“ (Флітвуд Мэк), якая называецца “Альбатрос“. Такая просьценькая, на першы погляд, інструмэнталка, якая, тым ня менш, добра перадае атмасфэру, што панавала ў сьвеце ў канцы 60-х. |
|
|
|
